Jākuba citati

Birznieks Jēkabs, Ieva Johansson
Jākuba citati. Bārnu dūmys vacuoku puordūmom

Cītī vuoki, 96 puslopys

Gruomotys autori ir desmitgadeigais Jēkabs Birznieks i juo mama Īva Johansson. “Jākuba citati” interesentim ir daīmami divejuos versejuos – kai latvīšu literarajā, tai latgalīšu rokstu volūdā. Ite pīduovojam vareibu nūpierkt “Jākuba citatus” taišni latgaliski, jo ituos versejis sataiseišonā pīsadalejom i mes.

Īva Johansson, kurei kasdīnā ir izaugsmis platformys “MeYou.One”, kuruos sātysvīta ir Daugovpiļs, trenere, pasuokumu moderatore i darbneicu vadeituoja par sevi soka, ka ir vīnkuorša mama, kurei ostoņu godu garumā pīrakstejuse niu jau desmit godu vacuo dāla Jēkaba dūmys, izsacejumus i citatus. Niu tī apkūpuoti gruomotā “Jākuba citati” i papyldynuoti ar iz sarunom rūsynūšim vaicuojumim par attīceigū temu. Drūsme, sāta, mīlesteiba, saprasšona, dorbs, ryupis, uzvarys i cytys kūpā pi pīcdesmit temu paleidzēs vacuokim sasarunuot ar bārnim, izskaidruot procesus, lītys i vysim kūpā ari dabuot atbiļdis.

Aicynojūt īpazeit “Jākuba citatus”, Īva soka: “Kasdīnā bārni vacuokim aizdūd sev aktualus vaicuojumus. Komunikaceja ir svareiga, kab bārns atsateisteitu i dabuotu atbiļdis iz svareigū. Kab izaveiduotu par sabīdreibys lūcekli, jam ir vajadzeigi skaidruojumi par attīceibu lykumsakareibom, par pastuovūšom socialekonomiskajom sistemom i procesim. Taipat, pasasokūt tam, ka sūpluok aug bārni ar sovu dabiskū interesi, zynuot gribiešonu, vacuokim ir vareiba pošim otkon puordūmuot sovys vierteibys i saimē izceļt tuos svareiguokuos. Obeji ar Jēkabu vielejam, kab itei gruomateņa ir kai īdviesme mīlesteibys, jaunu izzynuošonu i breinumu sarunom!”

Daļa nu gruomotys ījāmumu teik nūvierzeiti lobdareibys organizacejai Palīdzēsim.lv eipašūs bierneņu vacuoku nūdarbeibu organiziešonai.